Malayziyaning RTM telekanali ijodkorlari Fargʻona viloyatidagi hunarmandchilik,tarixiy obidalar va ziyoratgohlar haqida hujjatli film suratga olish maqsadida Fargʻona shahriga tashrif buyurishdi.
Oʻzbekistonning turizm salohiyatini xorijda keng targʻib qilish va Malayziyadan turistlar oqimini yanada koʻpaytirish maqsadida, Malayziya RTM teleijodkorlari Fargʻona ziyorat turizmi salohiyati haqida hujjatli film suratga oldi.
Filmda Qoʻqon shahridagi “Xudoyorxon oʻrdasi” va “Jomeʼ” majmuasi, Rishton tumanidagi “Mingboshi keramik” kulolchilik klasteri, “Xoʻja Ilgʻor” va “Mulla Ismatulloh qori” ziyoratgohlari, Fargʻona shahrida Ahmad al-Fargʻoniy haykali, Margʻilon shahrida “Yodgorlik” ipakchilik fabrikasi hamda “Pir Siddiq” majmuasi va muqaddas qadamjolar oʻrin olgan.
“Mazkur hujjatli film 10 qismdan iborat boʻlib, shundan 2 ta qismini Fargʻona viloyatiga ajratdik. Chunki bu yerdagi hunarmandlarning beqiyos qoʻl mehnatlari bilan yaratayotgan tabiiy mahsulotlari hamda qadimiy saqlanib qolgan ziyoratgohlaridan xabardormiz va oʻylaymanki, yurtimizda efirga ketadigan bu film malayziyalik teletomoshabinlarga manzur keladi”, – deydi RTM telekanali prodyusseri Ahmad Fayzal bin Muhammad.
Loyiha Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi tomonidan amalga oshirilmoqda.
Fargʻona viloyat Turizm boshqarmasi matbuot xizmati