Marg'ilonda Xalqaro "Atlas bayrami" V an'anaviy to'qimachilik festivali ko'tarinki ruhda o'tmoqda! 21.10.2022 20:27Festival doirasida Marg'ilon shahridagi "Erkin Vohidov" nomidagi ijodkorlar bog'ida har kuni xalq sayillari, mahalliy va xorijiy xunarmandlarning mahsulotlari yarmarkasi, xalq musiqaviy guruhlar ijrochilarining chiqishlari, an'anaviy kurash musobaqasi, dorbozlar va qo'g'irchoq tomoshalari, xalqaro va mahalliy atlas-adras ishlab chiqaruvchilar va xaridorlar o'rtasida B2B uchrashuvlar bo'lib o'tmoqda.
Festivalning birinchi kunida Marg'ilon shahridagi Marg'ilon hunarmandchilikni rivojlantirish markazi Said Ahmad Xo'ja Eshon madrasida Xalqaro "Atlas bayrami" V an'anaviy to'qimachilik festivalining ochilish marosimi o'tkazildi.
Shuningdek, ochilish marosimida Marg'ilon shahriga Xunarmandlar shahri maqomi berildi.
Kunning ikkinchi yarmida Xunarmandlar markazida Markaziy Osiyo dizaynerlarining namoyishi tashkillandi. Xorijlik dizaynerlar tomonidan milliy matoyimiz atlas va adrasdan tikilgan liboslar mehmonlarda katta qiziqish uyg'otdi.
Festivalning ikkinchi kunida "Zamonaviy dunyoda an'anaviy to'qimachilikning o'rni mavzusida ilmiy-amaliy anjuman bo'lib o'tdi. Konferensiyada mahalliy va xorijlik mutaxasislar ishtirok etdilar va mavzu doirasidagi o'z maruzalari bilan so'zga chiqdilar.
Kunning ikkinchi qismida Marg'ilon shahridagi Yodgorlik majmuasida Yevropa va Tinch okeani dizaynerlarining moda namoyishi tashkil etildi.
