Vazir o‘rinbosari Rishtondagi turistik maskanlar va yangi ochilgan muzeyga tashrif buyurdi.

Vazir o‘rinbosari Rishtondagi turistik maskanlar va yangi ochilgan muzeyga tashrif buyurdi. 08.05.2022 13:04

Avval xabar berganimizdek, shu kunlarda hududlarni kompleks rivojlantirish, tadbirkorlikni qo‘llab-quvvatlash va yangi investitsiya loyihalarini amalga oshirish, “mahallabay” tizim orqali aholining turmush sharoitini yaxshilash bo‘yicha ishlar holatini o‘rganish hamda qo‘shimcha chora-tadbirlar ishlab chiqish maqsadida O‘zbekiston Respublikasi Turizm va madaniy meros vaziri o‘rinbosari Nusratilla Zikrillayev Farg‘ona viloyatida xizmat safari bilan bo‘lib turibdi.

Kuni kecha N. Zikrillayev rahbarligidagi ishchi guruh Rishton tumaniga tashrif buyurib, tumanda faoliyat yurituvchi mehmonxona (joylashtirish), savdo, umumiy ovqatlanish, ko‘ngilochar, turoperator va turagent xizmatlarini ko‘rsatayotgan tadbirkorlik subyektlari faoliyati bilan tanishdilar. Ishchi guruh a'zolari O‘zbekiston Respublikasi Prezidentining 2022 yil 27-yanvardagi PQ-104-son qaroriga muvofiq Rishtonda qulay soliq rejimi joriy etilgan “Qalaynav”, “Qozi Axror”, “Zar Ariq”, “Xo‘ja Ilg‘or”, “Gumbaz”, “Markaz”, “To‘raobod”, “Navoiy”, “M. Topvoldiyev”, “Farovonlik”, “Oq-yer”, “Saroy” va boshqa mahalla fuqarolar yig‘illarida bo‘ldilar.

Xususan, ular “Navoiy” MFYdagi “MM Porcelian” MCHJ tomonidan “Chinni buyumlar ishlab chiqarish va kasanachilik asosida bezak berishni tashkil etish” investitsiya loyihasi bilan, “Mohidiyor Roshidon” MCHJga qarashli keramika zavodi, “Bo‘ston” MFYdagi “Baraka mozor” kompleksi va savdo do‘konlari, “Xo‘ja Ilg‘or” MFYdagi ziyoratgoh va meʼmoriy obidalar majmuasi, “Saroy” MFYdagi kulol Tohirjon Haydarovning muzey-ustaxonasi va boshqa obyektlar faoliyati bilan, tadbirkor va hunarmandlarni qiynayotgan muammolar bilan yaqindan tanishdilar.

Shuningdek, bugun N. Zikrillayev “M. Topvoldiyev” MFYga tashrif buyurib, u yerda tashkillangan muzeyning ochilish marosimida ishtirok etdi. Mazkur muzey shu qishloqlik ikkinchi jahon urushi qahramoni Mamadali Topvoldiyev hayoti va jangovar yiliga bag‘ishlangan bo‘lib, muzeydan uning oila aʼzolari taqdim qilgan ashyolar, qahramonning shaxsiy buyumlari, kitob va maktublari joy olgan. 

 

 Bahodir Hoshimov