Ma'lumki, Oʻzbekiston Respublikasi Prezidentining 2024-yil 12-yanvar kungi “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari toʻgʻrisida” PF-9-sonli Farmonida ichki turizm yoʻnalishidagi turoperatorlarning mahsulotlarini turistlarga taqdim qilish maqsadida “Toʻrt faslning har birida sayohat”turizm mavsumining ochilishi doirasida “Oʻzbekiston boʻylab sayohat qil!” ichki turizm yarmarkasi tashkil etish vazifasi belgilangan.
Shu munosabat bilan Farg‘ona viloyatida ham Ichki turizm yarmarkasi ko‘tarinki ruhda o‘tkazildi.
Tadbir joriy yil 29-mart kuni, Qo‘qon shahri sayyohlar bilan doim gavjum bo‘lgan Allomalar muzeyida Qo‘qon davlat muzey-qo‘riqxonasi bilan hamkorlikda tashkil etildi.
Tadbirni Farg‘ona viloyat hokimi o‘rinbosari Xurshidjon Axmedov, Qo‘qon shahar Nuroniylar jamg‘armasi raisi Muzrobjon Abdullayev, viloyat Turizm boshqarmasi boshlig‘i Muzaffar Temirov hamda boshqa mutasaddi tashkilotlar rahbarlari ochib berdi.
Yarmarkada Farg‘ona viloyatida faoliyat olib borayotgan 100 dan ortiq turoperatorlar, turagentlar va joylashtirish vositalari (mehmonxona, hostel va oilaviy mehmon uylari) oliy o‘quv yurtlarining turizm fakulteti talabalari, Eko faollar, Turizm elchilari hamda ommaviy axborot vositasi vakillari ishtirok etdilar..
Shuningdek, yarmarka doirasida mahalliy ustalarning milliy hunarmandchilik mahsulotlari ko‘rgazmasi, ichki turizm sohasida yangi hamkorlik loyihalarining taqdimotlari, tadbirkorlar, iste’molchilar va davlat idoralari o‘rtasida B2B va B2C uchrashuvlari tashkil etildi. Ushbu uchrashuvlar orqali viloyatning sayyohlik salohiyatini oshirish yo‘llari, shuningdek, turizm va iqtisodiyot sohalaridagi hamkorlikni yanada rivojlantirish imkoniyatlari muhokama qilindi.
Fargʻona viloyat Turizm boshqarmasi matbuot xizmati
