"Turizm fidoyisi” ko‘krak nishoni to‘g‘risida NIZOM

Vazirlar Mahkamasining 2020-yil

10-iyuldagi 433-son qaroriga

13-ILOVA

“Turizm fidoyisi” ko‘krak nishoni to‘g‘risida

NIZOM

1-bob. Umumiy qoidalar

1. Ushbu Nizom “Turizm fidoyisi” ko‘krak nishoni (keyingi o‘rinlarda — ko‘krak nishoni) bilan taqdirlash tartibini belgilaydi.

2. Ko‘krak nishoni bilan O‘zbekiston Respublikasida turizm sohasini rivojlantirishga va ommalashtirishga munosib hissa qo‘shgan davlat organlari xodimlari, jamoat tashkilotlari, tadbirkorlik subyektlari, ijtimoiy soha va ommaviy axborot vositalari vakillari hamda chet eldagi vatandoshlar xizmatlari va faol targ‘ibot ishlari uchun taqdirlanadilar.

Ko‘krak nishoni bilan O‘zbekiston Respublikasi fuqarosi bo‘lmagan shaxslar ham taqdirlanishi mumkin.

3. Ko‘krak nishoni bilan taqdirlash tartibi ushbu Nizomga ilova qilingan sxemaga muvofiq amalga oshiriladi.

2-bob. Ko‘krak nishoni bilan taqdirlash uchun hujjatlarni taqdim etish va ko‘rib chiqish

4. Mahalliy darajadagi davlat organlari, jamoat tashkilotlari, ommaviy axborot vositalari va tadbirkorlik subyektlari har yili 1-avgustga qadar o‘z xodimlarini ko‘krak nishoni bilan taqdirlash bo‘yicha takliflarni tegishlicha O‘zbekiston Respublikasi Turizmni rivojlantirish davlat qo‘mitasining (keyingi o‘rinlarda — Qo‘mita) hududiy bo‘linmalariga taqdim etadi.

Respublika darajasidagi davlat organlari, xorijdagi diplomatik vakolatxonalar, jamoat tashkilotlari, ommaviy axborot vositalari va tashkilotlar har yili 1-avgustga qadar o‘z xodimlarini ko‘krak nishoni bilan taqdirlash bo‘yicha takliflarni Qo‘mitagataqdim etadi.

Nomzod bo‘yicha taqdim etilgan takliflarga ilova sifatida nomzodning obyektivka-ma’lumotnomasi, so‘nggi uch yil davomida u tomonidan turizm sohasini rivojlantirish borasida amalga oshirilgan ishlar taqdim etiladi.

5. Qo‘mitaning hududiy bo‘linmalari tomonidan nomzodlar bo‘yicha taqdim etilgan hujjatlar belgilangan tartibda o‘rganib chiqiladi va nomzodlar yuzasidan xulosalar har yili 20-avgustga qadar Qo‘mitaga taqdim etiladi.

Qo‘mitaning hududiy bo‘linmalari va tizim tashkilotlari rahbarlari mazkur Nizomning 4-bandi birinchi xatboshisida belgilangan holatlarni istisno qilgan holda o‘z tashabbusiga ko‘ra ham nomzodlar to‘g‘risida har yili 20-avgustga qadar Qo‘mitaga taklif kiritishi mumkin.

6. Qo‘mita raisi tomonidan ko‘krak nishoni bilan taqdirlashga oid takliflarni ko‘rib chiqish bo‘yicha komissiya (keyingi o‘rinlarda — Komissiya) tashkil etiladi.

7. Komissiya yig‘ilishida nomzodlar bo‘yicha hujjatlar o‘rganilib, har yili 15-sentabrga qadar eng munosib nomzodlar bo‘yicha yakuniy xulosa chiqariladi.

Komissiya tomonidan nomzodlarni ko‘krak nishoni bilan taqdirlashda quyidagilar inobatga olinadi:

xorijda O‘zbekistonning ijobiy imijini shakllantirish va keng auditoriya o‘rtasida mamlakatimiz turizm salohiyatini targ‘ib etishdagi faolligi;

zamonaviy turizm mahsulotlari va innovatsion yechimga ega xizmatlarni yaratish bo‘yicha samarali faoliyatni amalga oshirganligi;

O‘zbekistonda turizm sohasini yanada rivojlantirishga qaratilgan xorijiy investitsiyalarni jalb etishdagi samarali faoliyati;

yetakchi xorijiy va mahalliy ommaviy axborot vositalarida O‘zbekistonning turizm salohiyatini targ‘ib qilish hamda mamlakatda turizm sohasida olib borilayotgan islohotlarni keng ommaga yetkazishga qaratilgan materiallar soni va ommalashganligi;

turizm sohasidagi davlat dasturlari, hududiy va boshqa dasturlarni ishlab chiqish hamda amalga oshirishda faol ishtirok etganligi;

turizmning alohida turlarini rivojlantirish va turizm yo‘nalishlari jozibadorligini oshirishdagi faolligi;

turistlarga ko‘rsatiladigan xizmat turlarini ko‘paytirish hamda xizmatlar sifatini yaxshilash bo‘yicha sa’yi harakatlari;

turizm sohasidagi tadbirkorlik subyektlarining huquqi va qonuniy manfaatlarini himoya qilish borasidagi samarali faoliyati;

turizm to‘g‘risidagi qonun hujjatlarining ijro etilishi ustidan samarali jamoatchilik nazoratini amalga oshirganligi;

madaniy meros obyektlarini saqlash, rivojlantirish va targ‘ib qilishda faol ishtirok etganligi;

turizm va servis sohasi uchun malakali kadrlar tayyorlashda ko‘p yillik tajribaga egaligi, ustoz-shogird an’analarini joriy etganligi, mahalliy va xalqaro xalqaro grant loyihalarida faol qatnashganligi;

turizm sohasini rivojlantirish istiqbollari va mavjud muammolarni chuqur ilmiy tahlil qilish asosida ishlab chiqilgan taklif, yangilik va ishlanmalarining dolzarbligi va amaliyotga joriy etilganligi;

turizm infratuzilmasini yanada rivojlantirish va yangi turizm yo‘nalishlarini tashkil etish borasidagi samarali faoliyati;

turizm infratuzilmasi obyektlarida sanitar-gigiyenik holatni yaxshilash ishlariga katta hissa qo‘shganligi;

turizm va unga yondosh sohalarda muvaffaqiyatli tadbirkorlik faoliyatini olib borib, samarali davlat-xususiy sektor sherikligi loyihalarini amalga oshirganligi;

O‘zbekistonda turizm sohasini rivojlantirishning normativ-huquqiy asoslarini mustahkamlash hamda davlat organlari o‘rtasida hamkorlikni rivojlantirish yo‘nalishidagi hissasi;

turizm sohasida O‘zbekiston va xorijiy mamlakatlar o‘rtasida hamkorlikni rivojlantirish va aloqalarni mustahkamlash bo‘yicha samarali faoliyati va boshqalar.

8. Qo‘mita raisi o‘z tashabbusi bilan ham ko‘krak nishoni bilan taqdirlashi mumkin.

3-bob. Ko‘krak nishoni bilan taqdirlash

9. Komissiya xulosasi asosida Qo‘mita raisining ko‘krak nishoni bilan taqdirlash to‘g‘risidagi buyrug‘i har yili 20-sentabrga qadar chiqariladi.

10. Ko‘krak nishoni “Butunjahon turizm kuni” — 27-sentabrda Qo‘mita raisi yoki uning nomidan va uning topshirig‘iga ko‘ra boshqa mas’ul shaxslar tomonidan tantanali ravishda topshiriladi.

11. Ko‘krak nishoni bilan taqdirlanganlar ro‘yxati Qo‘mitaning Internet butun jahon axborot tarmog‘idagi rasmiy va sohaviy veb-saytlarida hamda boshqa ommaviy axborot vositalarida e’lon qilinadi.

12. Ko‘krak nishoni bilan taqdirlangan shaxslar bazaviy hisoblash miqdorining o‘n baravari miqdorida biryo‘la to‘lanadigan pul mukofoti oladi. Biryo‘la to‘lanadigan pul mukofoti Turizmni rivojlantirish davlat qo‘mitasi huzuridagi budjetdan tashqari Turizm sohasini qo‘llab-quvvatlash jamg‘armasi mablag‘lari va qonun hujjatlarida taqiqlanmagan boshqa manbalar hisobidan beriladi.

13. Bir shaxs ko‘krak nishoni bilan bir marta taqdirlanadi.

14. Ko‘krak nishoni davlat mukofotlaridan keyin ko‘krakning chap tomoniga taqiladi.

4-bob. Yakunlovchi qoidalar

15. Qo‘mita ushbu Nizomga muvofiq ko‘krak nishoniga tavsiya etilgan nomzodlarning hujjatlari xolis ko‘rib chiqilishi uchun bevosita mas’uldir.

16. Mazkur Nizom talablari buzilishida aybdor bo‘lgan shaxslar qonun hujjatlariga muvofiq javobgar bo‘ladi.

“Turizm fidoyisi” ko‘krak nishoni to‘g‘risidagi nizomga
ILOVA

“Turizm fidoyisi” ko‘krak nishoni bilan taqdirlash

SXEMASI

Vazirlar Mahkamasining 2020-yil 10-iyuldagi 433-son qaroriga
14-ILOVA

“Turizm fidoyisi” ko‘krak nishoni

TAVSIFI

“Turizm fidoyisi” ko‘krak nishoni diametri 34 millimetrli doira shaklida bo‘lib, mis qotishmasidan tayyorlanadi.

Ko‘krak nishonining old tomoni markaz qismida sayohat va tinchlik timsolini aks ettiruvchi uchayotgan humo qush tasvirlangan bo‘lib, mamlakatimiz bayrog‘i ranglari bilan o‘ralgan humo qush qanotlari o‘rtasiga joylashtirilgan O‘zbekiston xaritasi O‘zbekistonning turizm maskanlariga sayohat va ularning joylashuvini anglatadi.

Ko‘krak nishonining aylanasi bo‘ylab zarhal hoshiya bilan o‘ralgan sariq rangdagi doira ichida “O‘zbekistan Respublikasi” so‘zlari tilla rangda yozilgan. Harflarning balandligi 2,3 millimetr, yozuvlar zarhallangan. Uning pastki qismida “Turizm fidoyisi” so‘zlari yozilgan.

Ko‘krak nishonining orqa tomoni yuqori qismida O‘zbekistonning turizm brendi “O‘zbekistan” logotipi va markazida to‘rt qatorda harflarning balandligi 2 millimetr bo‘lgan “Turizm sohasini rivojlantirishga qo‘shgan hissasi uchun” so‘zlari yozilgan.

Ko‘krak nishonining qalinligi 2,2 millimetr.

Tasvirlar va yozuvlar qavariqdir.

Ko‘krak nishoni old va orqa tomonlarining chetlari qavariq doira bilan o‘ralgan.

Ko‘krak nishoni halqa va ilmoqchalar yordamida to‘g‘ri to‘rtburchak shaklidagi qadag‘ichga ulangan.

Qadag‘ichning eni — 26 millimetr, bo‘yi — 17 millimetrdan iborat. Qadag‘ich eni 22 millimetrli shoyi lenta bilan qoplangan bo‘lib, lentaning markazidan eni 6 millimetrli ko‘k yo‘l o‘tgan. Uning har ikki tarafidan eni 1 millimetrli ko‘k, eni 2 millimetrli yashil va eni 5 millimetr bo‘lgan oq rangdagi yo‘llar tushirilgan.

Qadag‘ichning orqa tomoniga ko‘krak nishonini kiyimga taqib qo‘yish uchun to‘g‘nog‘ich ko‘rinishidagi moslama o‘rnatilgan.

Vazirlar Mahkamasining 2020-yil 10-iyuldagi 433-son qaroriga
15-ILOVA

“Turizm fidoyisi” ko‘krak nishoni guvohnomasining

TAVSIFI

“Turizm fidoyisi” ko‘krak nishoni guvohnomasi 160x110 millimetr o‘lchamdagi kitobcha shaklida bo‘lib, 240 g/kv.m. qalinlikdagi ofset qog‘ozdan tayyorlanadi.

Guvohnomaning tashqi tomoni (birinchi va to‘rtinchi betlari) to‘q ko‘k rangda bo‘lib, plyonka bilan qoplangan.

Guvohnomaning birinchi beti eni 7,5 millimetrli, ichki burchaklari aylana shaklida bo‘lgan to‘q yashil rangli hoshiya bilan o‘ralgan.

Guvohnomaning yuqori chekkasidan (birinchi beti) 35 millimetr pastda, markazda, oralig‘i 3,5 millimetrli uch satrdan iborat matn joylashgan. Birinchi satrda “TURIZM FIDOYISI” (katta harflarda, “Times new Roman Bolt” shrifti, 12-kegl), ikkinchi satrda “ko‘krak nishoni” (“Times new Roman Bolt” shrifti, 12-kegl) so‘zlari yozilgan. Undan 6 millimetr pastda “GUVONNOMASI” (katta harflarda, “Times new Roman Bolt” shrifti, 17-kegl) so‘zi yozilgan.

Yozuvlar zarhal rangida aks ettirilgan.

Guvohnomaning ichki tomoni (ikkinchi va uchinchi betlari) och yashil rangda bo‘lib, ofset usulida chop etilgan.

Ichki tomonining chap qismida (ikkinchi beti), markazda ko‘krak nishonining asliga teng o‘lchamdagi rangli tasviri aks ettirilgan.

Guvohnomaning ichki o‘ng tomoni (uchinchi beti) yuqori chekkasidan 8 millimetr pastda, markazda “GUVONNOMA” (katta harflarda, “Times new Roman Bolt” shrifti, 10-kegl) so‘zi hamda guvohnoma tartib raqami uchun “№” belgisi va 15 millimetrli chiziq joylashgan.

“GUVONNOMA” so‘zidan 11 millimetr pastda mukofotlangan shaxsning familiyasi, ismi va otasining ismini qayd etish uchun oralig‘i 8 millimetrli uchta chiziq tortilgan.

Pastki chiziqdan 6 millimetr quyida, markazda, oralig‘i 2 millimetrli uch satrdan iborat matn joylashgan. Birinchi satrda “O‘zbekiston Respublikasi”, ikkinchi satrda “Turizmni rivojlantirish davlat”, uchinchi satrda “qo‘mitasining” (“Times new Roman Bolt” shrifti, 10-kegl) so‘zlari yozilgan.

Undan 5 millimetr pastda oralig‘i 4 millimetr bo‘lgan ikki satrdan iborat matn joylashgan. Birinchi satrda “20__ y. “___” ___________dagi”, ikkinchi satrda “____-son buyrug‘iga asosan” (“Times new Roman Bolt” shrifti, 10-kegl) so‘zlari yozilgan.

Undan 5 millimetr pastda, markazda, oralig‘i 3 millimetrli ikki satrdan iborat matn joylashgan. Birinchi catrda “Turizm sohasini rivojlantirishga” ikkinchi satrda “qo’shgan hissasi uchun” (kichik harflarda, “Times new Roman Bolt” shrifti, 12-kegl), uchinchi satrda “TURIZM FIDOYISI” (katta harflarda, “Times new Roman Bolt” shrifti, 14-kegl), “ko‘krak nishoni bilan mukofotlanadi” (“Times new Roman Bolt” shrifti, 10-kegl) so‘zlari yozilgan.

So‘nggi so‘zlardan 9 millimetr pastda, chap tomonda “Rais” (“Times new Roman Bolt” shrifti, 10-kegl) so‘zi yozilgan.