Farg‘onada yangi gastronomik obyekt ochildi. 05.03.2022 22:40Bugun, 5-mart kuni Farg‘ona shahridagi “Ziyorat” mehmonxonasi qoshida turkiyalik investorlar ishtirokidagi “Kapadokiya turkish” restorani o‘z faoliyatini boshladi.
Bir vaqtning o‘zida 400 ta mijozga xizmat ko‘rsata oladigan mazkur obyekt shaharning qoq markazida, “Terak mozor” deb atalgan mavzeda, Marg‘ilonsoyning shundoqqina o‘ng qirg‘og‘ida joylashgan.
U bir tomondan mehmonxonaga tutashib ketgan bo‘lsa, boshqa tomondan shaharning dehqon bozori, buyum bozori, gul bozori va elektrotexnika do‘konlari qarshisida – shaharning barcha markaziy ko‘chalari tutashgan ko‘chalari chorrahasi qarshisida qad ko‘tarib turibdi.
Qachonlardir ko‘rimsizgina bo‘lgan kafe turkiyalik tadbirkorlarning saʼyi-harakati bilan bugun hashamatli restoranga aylandi. Eʼtiborlisi, unda 10 dan ortiq turkiyalik oshpazlar bilan birga 30 dan ortiq farg‘onalik yosh oshpazlar ham ish boshladilar.
Restoran menyusidan esa, Turkiyaning eng mazali taomlari va shirinliklari qatorida o‘zbek milliy taomlari ham o‘rin olgan.
Uning tantanali ochilish marosimida Farg‘ona viloyat hokimligi, viloyat Turizm va madaniy meros bosh boshqarmasi vakillari, bir necha turkiyalik tadbirkorlar, Farg‘ona shahar fuqarolari hamda OAV vakillari ishtirok etdi.
Aminmizku, ushbu restoran faoliyatining yo‘lga qo‘yilishi Farg‘onada gastronomik turizmni yanada rivojlanishiga salmoqli hissa qo‘shadi. Restoran Farg‘ona shahri, Qurbonjon Dodxoh ko‘chasi 2-A uyda joylashgan.
Bahodir Hoshimov