Rishtonda yangi xostel ochildi 21.04.2022 16:30Farg‘ona viloyatida O‘zbekiston Respublikasi Turizm va madaniy meros vazirligi monitoring guruhi tomonidan O‘zbekiston Respublikasi Prezidentining 2022-yil 27-yanvardagi “Xizmatlar sohasini rivojlantirishga oid qo‘shimcha chora tadbirlar to‘g‘risida”gi PQ-104-sonli qarori hamda Vazirlar Mahkamasining 2018-yil 7-avgustdagi “Oilaviy mehmon uylari faoliyatini tashkil etish to‘g‘risida”gi 631-sonli qarori yuzasidan amalga oshirilgan ishlar o‘rganilmoqda.
O‘zbekiston Respublikasi Turizm va madaniy meros vazirligining boshqarma boshlig‘i o‘rinbosari L.Zakirlayeva rahbarligidagi monitoring guruhi 21-aprel kuni Rishton tumaniga tashrif buyurdi. Kun davomida tumanning turistik salohiyati yuqori bo‘lgan “Qalaynav”, “Qozi Axror”, “Zar Ariq”, “Xo‘ja Ilg‘or”, “Gumbaz”, “Markaz”, “To‘raobod”, “Navoiy”, “M. Topvoldiyev”, “Farovonlik”, “Oq-yer” va “Saroy” mahalla fuqarolari yig‘illari hududida joylashgan mehmonxona (joylashtirish), savdo, umumiy ovqatlanish, ko‘ngilochar, turoperator va turagent xizmatlarini ko‘rsatayotgan tadbirkorlik subyektlari faoliyati o‘rganildi.
Shuningdek, bugun tumanda yangi joylashtirish vositasi – “SAID “S” CERAMICS” XOSTEL” o‘z faoliyatini boshlab, unga o‘rnatilgan tartibda Oilaviy mehmon uylari va xostellar yagona reyestridan ko‘chirma topshirildi. Mazkur xostel 16 ta xonaga ega bo‘lib, u bir vaqtning o‘zida 35 ta mehmonni qabul qila oladi.
Monitoring jarayonida Farg‘ona viloyati Turizm va madaniy meros bosh boshqarmasi mutasaddi xodimlari ishtirok etdi.
Bahodir Hoshimov
