Rishton tumani "M.Topvoldiyev" turizm mahallasida JICA turoperatorlari va ekspertlari uchun infotur tashkil etildi 25.05.2026 10:04Farg‘ona viloyatining mashhur kulolchilik markazi hisoblangan Rishton tumanida joylashgan M.Topvoldiyev turizm mahallasida Yaponiya xalqaro hamkorlik agentligi - JICA turoperatorlari va ekspertlari ishtirokida infotur tashkil etildi.
Mehmonlar mahallaga milliy qadriyatlarimizga xos tarzda, karnay-surnay sadolari va non-tuz bilan tantanali ravishda kutib olindi. Samimiy va do‘stona muhitda o‘tgan tashrif davomida ishtirokchilar mahallaning turizm salohiyati, hunarmandchilik an’analari hamda mahalliy aholining turizm sohasidagi faoliyati bilan yaqindan tanishdilar.
Infotur doirasida mehmonlar Rishton kulolchilik maktabining noyob an’analari, sopol mahsulotlarini tayyorlash jarayoni va milliy naqshlar sirlari haqida batafsil ma’lumot oldilar. Shuningdek, ular uchun maxsus mahorat darsi tashkil qilinib, yaponlik mehmonlar o‘zlari ham kulolchilik mahsulotlarini yasab ko‘rish imkoniga ega bo‘ldilar.
Tadbir ishtirokchilari mahallada turizmni rivojlantirish uchun yaratilgan sharoitlar, mehmondo‘stlik muhiti va milliy madaniy merosni yuqori baholadilar. Ayniqsa, mahalliy aholining samimiy kutib olishi va an’analarga bo‘lgan hurmati mehmonlarda katta taassurot qoldirdi.
Mazkur infotur xalqaro hamkorlikni mustahkamlash, Rishtonning turizm imkoniyatlarini xorijiy bozorlarda keng targ‘ib qilish hamda mahalliy turizmni yanada rivojlantirish yo‘lida muhim qadam bo‘ldi.
https://t.me/ferghanatourism
