Ўзбекистон Республикаси Президентининг 2024 йил 12 январь кунидаги “Республикага хорижий туристлар оқимини кескин ошириш ҳамда ички туризмни яна-да жадаллаштириш чора-тадбирлари тўғрисида” ПФ-9-сонли фармонининг 19.2-бандида белгиланган вазифалар ижросини таъминлаш мақсадида жорий йилнинг 23 май куни Фарғона вилояти ҳокими ўринбосари Хуршиджон Ахмедов бошчилигида туризм соҳаси тадбиркорлари иштирокида сайёр қабул (очиқ мулоқот) ўтказилди.
Унда тўғридан-тўғри мулоқот асосида туроператорлар, меҳмонхона ва хостел эгалари, шунингдек Туризм техникуми вакиллари қатнашди.
Сайёр қабулда тадбиркорлар ва соҳада фаолият юритаётган мутахассислар томонидан туризм инфратузилмасини ривожлантириш, янги туризм йўналишларини очиш, кичик бизнесга кўмаклашиш, молиявий ва ҳуқуқий масалаларга оид таклиф ва муаммолар билдирилди.
Х.Ахмедов ҳар бир мурожаатни диққат билан тинглаб, айрим масалаларни жойида ҳал этди, қолган мурожаатлар бўйича Туризм бошқармаси масъул ходимларига топшириқлар бериб, назоратга олинди.
Сайёр қабул якунида Х.Ахмедов туризм соҳасини янада ривожлантириш учун барча даражадаги мулоқот ва очиқлик муҳимлигини таъкидлаб, тадбиркорларни фаол ҳамкорликка чақирди.
Фарғона вилоят Туризм бошқармаси матбуот хизмати
